सल्यान । सल्यानका तीन गाउँपालिका र एक नगरपालिकामा गरिएको स्वास्थ्य परीक्षणका क्रममा ८८ जनामा स्क्रबटाइफसको संक्रमण पुष्टि भएको छ।

दार्मा, कुमाख र कालीमाटी गाउँपालिका तथा बागचौर नगरपालिकाका स्वास्थ्य शाखाले असोज ७, ८ र ९ गते सञ्चालन गरेको स्क्रबटाइफस खोजपड्ताल शिविरमा परीक्षण गरिएका व्यक्तिमध्ये ८८ जनामा संक्रमण देखिएको हो।

स्वास्थ्य सेवा कार्यालय सल्यानका जनस्वास्थ्य अधिकृत ताराप्रसाद रिजालका अनुसार सबैभन्दा धेरै संक्रमण दार्मा गाउँपालिकामा देखिएको छ। त्यहाँ मात्रै ५४ जनामा स्क्रबटाइफस पुष्टि भएको छ।

दार्मा गाउँपालिका–१ मा १६० जनाको परीक्षण गर्दा ३७ जनामा र वडा नम्बर ५ मा १८१ जनाको परीक्षण गर्दा १७ जनामा संक्रमण देखिएको रिजालले बताए।

यस्तै, कुमाख गाउँपालिका–४ मा सात जनाको परीक्षण गर्दा एक जना पुरुष, वडा नम्बर ६ मा ५३ जनामध्ये ६ जना र वडा नम्बर ७ मा ३८ जनाको परीक्षण गर्दा १५ जनामा संक्रमण पुष्टि भएको छ।

कालीमाटी गाउँपालिका–४ धुरचौरमा २१ जनाको परीक्षण गर्दा एक महिला र एक पुरुषमा संक्रमण देखिएको छ। बागचौर नगरपालिका–४ मा १११ जनाको परीक्षण गर्दा १० जना महिलामा स्क्रबटाइफस पुष्टि भएको रिजालले बताए।

संक्रमण बढ्दै गएपछि स्वास्थ्य सेवा निर्देशनालय सुर्खेतले यसअघि करिब ८०० थान परीक्षण किटसहित आवश्यक औषधि पठाएको थियो। निर्देशनालयका निर्देशक डा. रविन खड्काका अनुसार थप ४५० थान परीक्षण किट प्रदेश स्वास्थ्य आपूर्ति व्यवस्थापन केन्द्रमार्फत पठाइएको छ।