बारामा करेन्ट लागेर एक बालकको मृत्यु भएको छ। अन्य चारजना घाइते भएका छन्।

कोल्हवी नगरपालिका–३ जुगुवा टोलमा करेन्ट लागेर स्थानीय श्याम रामका १० वर्षीय छोरा आकाशको मृत्यु भएको जिल्ला प्रहरी कार्यालय बाराका प्रवक्ता मीनबहादुर घलेले जानकारी दिए।

घरमा टेलिभिजन चलाउने क्रममा बिजुलीको तार सर्ट भई करेन्ट लाग्दा आकाश गम्भीर घाइते भएका थिए।

उपचारका लागि उनलाई प्रादेशिक अस्पताल कलैया लगिएको थियो। चिकित्सकले इसिजी परीक्षण गर्दा अस्पताल ल्याउनुअघि नै उनको मृत्यु भइसकेको जानकारी चिकित्सकले गराएका छन्।

करेन्टबाट बालकलाई छुटाउने क्रममा उनकी हजुरआमा ७० वर्षीया ऐतबरिया देवी, दिदी १२ वर्षीया निलम, छिमेकी ४० वर्षीया फूलकुमारी राम र ४१ वर्षीया अनिता शर्मा गम्भीर घाइते भएको छ।

उनीहरूमध्ये ऐतबरिया, फूलकुमारी र अनिताको कोल्हवीस्थित तामागढी अस्पतालमा उपचार भइरहेको छ भने निलमको कोल्हवीस्थित सिटी अस्पतालमा उपचार भइरहेको प्रहरीले जनाएको छ ।