दोलखाको जिरी नगरपालिका वडा नम्बर– ९ मा एकजना महिला शिक्षकलाई कोभिड– १९ सङ्क्रमण पुष्टि भएको छ । केही दिन अघि काठमाडौँ पुगेर फर्किएको उनलाई रुघा, खोकी, ज्वरो, जिउ दुख्ने लगायतका समस्या देखिएपछि स्वाब परीक्षण गर्दा कोभिड– १९ सङ्क्रमण पुष्टि भएको जिरी नगरपालिकाको स्वास्थ्य शाखा प्रमुख वरिष्ठ जनस्वास्थ्य अधिकृत केशव दहालले बताए ।

वडा नम्बर– ९ ठूलोपातलको एक विद्यालयमा भदौ २७ गते सुरुमा दुई जना शिक्षकलाई रुघा, खोकी, ज्वरो जस्ता समस्या देखिएको र त्यो समस्या विद्यार्थी तथा अभिभावकहरुमा समेत देखिएपछि असोज ४ गतेबाट उक्त विद्यालय बन्द गरिएको थियो । 

ठूलोपातलमा इन्फ्लुएन्जा देखिएको जानकारी आएपछि जिरी नगरपालिकाबाट डक्टर सहितको टोली पुगेर शिक्षक, विद्यार्थी र अभिभावक सहित ७ जनाको स्वाब परीक्षण गर्दा एक जना महिला शिक्षकमा कोभिड– १९ सङ्क्रमण पुष्टि भएको नगरपालिकाको जनस्वास्थ्य अधिकृत सुस्मीता रिमालले बताइन । ७ जनाको स्वाब परीक्षण गरिएकोमा ५ जनामा भने इन्फ्लुएन्जा देखिएको थियो ।

७ जना बिरामीको स्वाब संकलन गरी असोज ६ गते राष्ट्रिय जनस्वास्थ्य प्रयोगशाला टेकुमा पटाइएकोमा असोज ९ गते शुक्रवार एक जनामा कोभिड– १९ सङ्क्रमण देखिएको बारे जानकारी प्राप्त भएको थियो । 

कोभिड– १९ सङ्क्रमण पुष्टि भएको महिला शिक्षकमा अहिले कुनै लक्षण नदेखिएको र उनी पूर्णरुपमा स्वस्थ रहेको जनस्वास्थ्य अधिकृत रिमालले बताइन । अहिले उनलाई होम आईसोलेसनमा राखिएको र उनीसंग नजिक रहेका केहीलाई रुघा, खोकी, ज्वरोको सामान्य समस्या देखिएपछि उनीहरु लाई पनि होम आईसोलेसनमा राखेर निगरानी गरिरहेको जिरी नगरपालिकाको स्वास्थ्य शाखाले जनाएको छ ।

जिरी नगरपालिका वडा नम्बर– ९ को ठूलोपातल, लेख खर्क र सल्लेमा डेंगु, स्क्रफ टाईफस र इन्फ्लुएन्जाको लक्षण भएका बिरामी देखिएको तर कसैलाई पनि अस्पतालमै राखेर उपचार गर्नुपर्ने अवस्था भने नरहेको जनस्वास्थ्य अधिकृत रिमालले बताइन । नगरपालिकाको अन्य केही ठाउँमा भने डेंगु र स्क्रफ टाईफसका विरामीमात्र देखिएको उनको भनाई छ । 

सुरु– सुरुमा सङ्क्रमण देखिएका बिरामी ठिक भएको र केही नयाँ विरामीहरु देखिएकोले कन्ट्रयाक ट्रेसिङको काम भै रहेको जिरी नगरपालिकाको स्वास्थ्य शाखा प्रमुख रिमालले बताइन ।