दाङको घोराहीकी १२ वर्षीया बालिकामा एचपीभी खोप लगाएपछि स्वास्थ्यमा गम्भीर समस्या देखिएको भन्दै प्रतिनिधिसभामा सरकारको ध्यानाकर्षण गराइएको छ ।

बिहीबार बसेको प्रतिनिधिसभा बैठकमा नेकपा (एमाले) की सांसद साजिदा खातुन सिद्दिकीले कक्षा ६ मा अध्ययनरत आयशा परबिनको स्वास्थ्य अवस्थाबारे सरकारको ध्यानाकर्षण गराएकी हुन् ।

सांसद सिद्दिकीका अनुसार बालिकालाई एचपीभी खोप लगाएलगत्तै स्वास्थ्यमा जटिलता देखिएको थियो । गम्भीर बिरामी भएपछि उनलाई राप्ती स्वास्थ्य विज्ञान प्रतिष्ठानमा ९ दिनसम्म भेन्टिलेटरसहितको आईसीयूमा उपचार गरिएको थियो ।

हाल बालिका घर फर्किए पनि उनका हातखुट्टा चल्न नसक्ने अवस्था रहेको सांसद सिद्दिकीले सदनमा जानकारी गराइन् । उनले घटनाको गम्भीरतापूर्वक छानबिन गरी स्वास्थ्य समस्या र खोपबीचको सम्बन्धबारे आवश्यक परीक्षण गर्न तथा पीडित परिवारलाई उचित उपचार र क्षतिपूर्तिको व्यवस्था गर्न सरकारसँग माग गरिन् ।

यसैबीच, सांसद सिद्दिकीले रसुवा बाढीमा परी बेपत्ता भएका नागरिकहरूको खोजी तथा उद्धारको अवस्थाबारे पनि सरकारसँग जवाफ माग गरिन् ।

उनले मुलुकमा बढ्दो महँगी, नागरिकले भोगिरहेको आर्थिक संकट तथा आत्महत्याका घटनाप्रति समेत सरकारको ध्यानाकर्षण गराइन् । नागरिकको जीवनरक्षा र आर्थिक संकट न्यूनीकरणका लागि सरकारले ठोस योजना ल्याउनुपर्ने उनको भनाइ थियो ।

सांसद सिद्दिकीले भनिन्, ‘देश महँगो भयो, हरेक कुरा महँगो हुँदै जाँदा नागरिक पिल्सिएका छन् । आत्महत्याका घटना किन बढिरहेका छन् ? सरकारले नागरिकको जीवन रक्षाका लागि कस्तो योजना बनाउँदैछ ?’

उनले जिम्मेवार अभिभावकका रूपमा सरकारले नागरिकका प्रश्नको जवाफ दिनुपर्ने बताइन्।