धुन्चे, रसुवा । भदौ १० गते चीनको तिब्बततर्फबाट रसुवागढी नाका हुँदै भोटेकोशी नदीमा आएको विनाशकारी बाढीपछि रसुवामा कार्यरत १२ जना स्वास्थ्यकर्मी तथा कर्मचारी सम्पर्कविहीन भएका छन्।

स्वास्थ्य तथा सामाजिक विकास मन्त्रालय, बागमती प्रदेशअन्तर्गत जनस्वास्थ्य कार्यालय, रसुवाले भदौ १३ गते सार्वजनिक सूचना जारी गर्दै सम्पर्कविहीन स्वास्थ्यकर्मी, कर्मचारी तथा उनीहरूसँगै रहेका परिवारका सदस्यहरूको विवरण सार्वजनिक गरेको हो।

कार्यालयका अनुसार सम्पर्कविहीन हुनेमा स्याफ्रुवेशी स्वास्थ्य चौकीका हे.अ. खम्बु बोहोरा, गोसाइँकुण्ड गाउँपालिकाका मनोसामाजिक परामर्शकर्ता कोपिला के.सी. ७ महिनाको बच्चासहित, दाहालफेँदी सामुदायिक स्वास्थ्य इकाइका अ.हे.व. विजय कुमार घले रहेका छन्।

त्यस्तै, टिमुरे स्वास्थ्य चौकीका अ.हे.व. सुस्मिता पाण्डे २ वर्षको बच्चासहित, सोही स्वास्थ्य चौकीका अ.हे.व. कर्मा हिसिस घले र अ.न.मि. सरिता मल्ल ३ वर्षको बच्चासहित सम्पर्कविहीन छन्।

रसुवागढी हेल्थ डेस्कका हे.अ. गोविन्द यादव र स्टाफ नर्स ललिता देवी कुमाई ८ महिनाको बच्चासहित पनि सम्पर्कमा आएका छैनन्।

यसैगरी, उत्तरगया गाउँपालिकाका स्वास्थ्य शाखा प्रमुख तथा जनस्वास्थ्य निरीक्षक बलराम न्यौपाने, सोही स्वास्थ्य शाखाका जनस्वास्थ्य अधिकृत प्रदिप न्यौपाने, श्री निलकण्ठ माध्यमिक विद्यालय उत्तरगयाकी विद्यालय नर्स ममता श्रेष्ठ श्रीमान्, २ वर्षको छोरा र ४ वर्षकी छोरीसहित तथा मैलुङ्ग सामुदायिक स्वास्थ्य इकाइ, उत्तरगयाकी अ.न.मि. दिनिशा शाही सम्पर्कविहीन रहेको कार्यालयले जनाएको छ।

बाढीका कारण प्रभावित क्षेत्रमा सञ्चार तथा यातायात सेवा अवरुद्ध हुँदा उनीहरूसँग सम्पर्क हुन नसकेको जनाइएको छ। सम्पर्कविहीन स्वास्थ्यकर्मी तथा कर्मचारीको खोजी कार्य जारी रहेको कार्यालयले जनाएको छ।

विपद्का बेला स्वास्थ्य सेवा प्रवाहमा प्रत्यक्ष खटिएका स्वास्थ्यकर्मी तथा कर्मचारी नै सम्पर्कविहीन भएपछि रसुवाको स्वास्थ्य क्षेत्रमा समेत गम्भीर प्रभाव परेको छ।