काठमाडौं । रसुवाको भोटेकोशी हुँदै त्रिशूली नदीमा आएको बाढीका कारण ज्यान गुमाउनेको संख्या ५७९ पुगेको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार शुक्रबार साँझ ७ बजेसम्म विभिन्न जिल्लामा ५७९ जनाको शव फेला परेको हो।

प्राधिकरणका अनुसार रसुवामा १२, नुवाकोटमा ३७, धादिङमा ४०, गोरखामा ४६, नवलपरासी पूर्वमा १५४, नवलपरासी पश्चिममा २७, तनहुँमा ३० र चितवनमा २३३ जनाको शव भेटिएको छ।

बाढीपछि १ हजार ९२४ जना अझै सम्पर्कविहीन रहेको प्राधिकरणले जनाएको छ।सम्पर्कविहीन हुनेमा नेपाल प्रहरीका २८, नेपाली सेनाका ४५, सशस्त्र प्रहरीका १३, भन्सार कार्यालयका १५ र अध्यागमन कार्यालयका कर्मचारी रहेका छन्।

त्यस्तै, रसुवाबाट १६१, नुवाकोटबाट १, जलविद्युत् आयोजनामा कार्यरत ९३३, मकवानपुरका ६६, विदेशी नागरिक ५१७ र विदेशमा बस्ने तथा नेपाल घुम्न आएका नेपाली १२६ जना सम्पर्कविहीन रहेको प्राधिकरणको विवरणमा उल्लेख छ। लाङटाङ राष्ट्रिय निकुञ्जका ३ जना पनि सम्पर्कविहीन छन्।

बाढी तथा पहिरोबाट प्रभावित क्षेत्रमा खोज तथा उद्धार कार्य जारी रहेकाले मृतक र सम्पर्कविहीनको संख्या थप बढ्न सक्ने जनाइएको छ।