काठमाडौं । रसुवामा आएको भीषण बाढीले घरबारसँगै आफन्तसमेत गुमाएका परिवारका सदस्यहरू अहिले प्रियजनको खबरको प्रतीक्षामा छन्।

टिचिङ अस्पतालमा आफन्तको खोजीमा पुगेकाहरूको  हातमा आफन्तका तस्बिर छ ।  कतैबाट केही खबर आउँछ कि भन्ने आशामा घण्टौँदेखि कुरिरहेका छन्।  कोही आफन्तको तस्बिर देखाउँदै खोजी गरिदिन आग्रह गरिरहेका छन् भने कोही फोन बज्ने प्रतीक्षामा छन्।

कसैका आमा–बुबा सम्पर्कविहीन छन्, कसैका दिदीभाइ र छोराछोरी बेपत्ता छन्। अस्पताल परिसरमा भेटिने हरेक अनुहारमा बेचैनी छ, आँखामा आँसु छ र मनमा एउटै प्रश्न-‘हाम्रा आफन्त कहाँ छन्?’

रुपा घले हातमा आफन्तहरूको तस्बिर बोकेर टिचिङ अस्पताल पुगेकी छन्। उनका दिदी, दिदीका सानो छोरा र दाइ बाढीपछि बेपत्ता छन्। आफन्तको अवस्था पत्ता लाग्ने आशामा उनी अस्पताल परिसरमा कुरिरहेकी छन्।

त्यस्तै, सोनाम तामाङका आमा–बुबा नै बाढीपछि सम्पर्कविहीन छन्। आफ्ना बुबाआमाको अवस्था कस्तो छ भन्ने जानकारी नपाउँदा उनी गहिरो चिन्तामा छन्।

उमा घर्ती मगर पनि देवरको खोजीमा अस्पताल पुगेकी छन्। “केही खबर पाइन्छ कि” भन्ने आशामा उनी अस्पताल परिसरमा प्रतीक्षारत छन्।

रसुवा बाढीले घर र सम्पत्तिसँगै धेरै परिवारका आफन्त र भरोसा पनि बगाएको छ। बेपत्ताको अवस्था पत्ता लाग्ने आशामा पीडित परिवार अस्पतालदेखि सम्बन्धित निकायसम्म धाइरहेका छन्।