काठमाडौं । भारतको महाराष्ट्रस्थित अमरावती जिल्ला महिला अस्पतालको नवजात शिशु अतिदक्षता कक्ष (एनआइसीयू) मा सोमबार बिहान भीषण आगलागी हुँदा तीन नवजात शिशुको मृत्यु भएको छ। घटनामा अन्य छ जना शिशु घाइते भएका छन्।

अस्पताल प्रशासनका अनुसार बिहान करिब ३:३० बजे अस्पतालको तेस्रो तलामा रहेको एनआइसीयू कक्षमा आगलागी भएको हो। प्रारम्भिक जानकारीअनुसार भेन्टिलेटरमा समस्या आएपछि आगलागी सुरु भएको बताइएको छ।

घटनाका बेला तेस्रो तलाका तीनवटा कोठामा गरी ३९ जना नवजात शिशु उपचाररत थिए। तीमध्ये १२ जना एनआइसीयूमा रहेका थिए।

आगलागी भएपछि चिकित्सक, नर्स तथा स्वास्थ्यकर्मीले तत्काल उद्धार सुरु गरी भेन्टिलेटरमा रहेका शिशुसहित अन्य नवजातलाई सुरक्षित स्थानमा सारेका थिए। घाइते छ जना शिशुलाई थप उपचारका लागि नजिकैको सरकारी सुपर स्पेसलिटी सेन्टरमा भर्ना गरिएको छ।

सञ्चालनमा आएको करिब एक वर्ष मात्रै भएको विशेष नवजात शिशु स्याहार एकाइमा आगलागी नियन्त्रण प्रणाली समयमै सक्रिय हुन नसकेको विषयमा समेत प्रश्न उठेको छ।

भेन्टिलेटरमा कसरी समस्या आयो, आगलागीको वास्तविक कारण के हो र उपकरणको नियमित प्राविधिक परीक्षण भएको थियो कि थिएन भन्ने विषयमा प्रहरी तथा अस्पताल प्रशासनले अनुसन्धान थालेका छन्।

प्रहरीले घटनाको प्राविधिक पक्षसहित छानबिन गरी लापरबाही वा त्रुटि देखिए जिम्मेवार पक्षमाथि कारबाही प्रक्रिया अघि बढाउने जनाएको छ।