काठमाडौं । औषधि व्यवस्था विभागबाट प्रदान गरिने औषधि आयात तथा निर्यातसम्बन्धी विभिन्न सेवा अब नेपाल राष्ट्रिय एकद्वार प्रणाली (NNSW) मार्फत अनलाइन उपलब्ध हुने भएका छन्।
विभागले औषधि, औषधिजन्य कच्चा पदार्थ तथा औषधि उत्पादन सामग्रीको निकासी तथा पैठारीसम्बन्धी सिफारिसपत्र, अनुमतिपत्र र प्रमाणपत्रलगायतका सेवा डिजिटल माध्यमबाट उपलब्ध गराउने उद्देश्यले बिहीबारदेखि उक्त प्रणालीको औपचारिक शुभारम्भ गरेको हो।
औषधि व्यवस्था विभाग, बिजुलीबजारमा आयोजित समारोहमा विभागका महानिर्देशक भरत भट्टराईको अध्यक्षता तथा भन्सार विभागका महानिर्देशकको प्रमुख आतिथ्यतामा प्रणालीको शुभारम्भ गरिएको हो। कार्यक्रममा अर्थ मन्त्रालय, भन्सार विभाग, राष्ट्रिय राष्ट्रिय एकद्वार प्रणाली (NNSW), औषधि व्यवस्था विभाग तथा राष्ट्रिय औषधि प्रयोगशालाका प्रतिनिधिहरू सहभागी थिए।
यी सेवा अनलाइनबाट लिन सकिने
नयाँ प्रणालीमार्फत औषधिजन्य कच्चा पदार्थ आयात, औषधि निर्यात, स्वास्थ्य प्रविधिजन्य सामग्री आयात, प्रयोगशाला परीक्षणका लागि आवश्यक नमुना तथा रेफरेन्स स्ट्यान्डर्ड आयातसम्बन्धी सिफारिसपत्रका लागि अनलाइन आवेदन दिन सकिनेछ।
त्यसैगरी, बिरामीका लागि औषधि आयात सिफारिसपत्र तथा औषधि आयातका लागि विशेष सिफारिसपत्रलगायतका सेवा पनि अनलाइन प्रणालीबाट उपलब्ध हुने विभागले जनाएको छ।
यस प्रणालीमार्फत सेवाग्राहीले आवश्यक विवरण भरेर अनलाइन आवेदन दिन, सम्बन्धित कागजात अपलोड गर्न, लाग्ने राजस्व तथा शुल्क अनलाइन भुक्तानी गर्न र स्वीकृत सिफारिसपत्र तथा प्रमाणपत्र प्राप्त गर्न सक्नेछन्।
सेवा प्रवाह सहज हुने अपेक्षा
नयाँ व्यवस्थाले औषधि आयात तथा निर्यातसम्बन्धी सेवा प्राप्त गर्न लाग्ने समय र प्रक्रियागत झन्झट कम गर्ने अपेक्षा गरिएको छ। साथै, प्रशासनिक प्रक्रिया सहज र व्यवस्थित बनाउनुका साथै व्यापार सहजीकरण तथा सम्बन्धित सरकारी निकायबीचको समन्वयलाई थप प्रभावकारी बनाउन सहयोग पुग्ने विश्वास गरिएको छ।
औषधि व्यवस्था विभाग, भन्सार विभाग तथा अर्थ मन्त्रालयबीचको सहकार्यमा अघि बढाइएको यो पहललाई विभागका सेवाहरू डिजिटल माध्यममा रूपान्तरण गर्ने तथा नेपालमा डिजिटल सुशासन र व्यापारसम्बन्धी प्रक्रियाको आधुनिकीकरण गर्ने दिशामा महत्त्वपूर्ण कदमका रूपमा लिइएको छ।