काठमाडौं । दशैंको सार्वजनिक बिदाका कारण यस वर्ष बालबालिकालाई भिटामिन ‘ए’ र जुकाको औषधि खुवाउने कार्यक्रम सरेको छ। स्वास्थ्य सेवा विभागका अनुसार पहिलो चरणको राष्ट्रिय भिटामिन ‘ए’ तथा जुकाको औषधि वितरण कार्यक्रम कात्तिक १७ र १८ गते सञ्चालन हुने भएको छ।

सरकारले हरेक वर्ष पहिलो चरणमा कात्तिक २ र ३ गते तथा दोस्रो चरणमा वैशाख ६ र ७ गते बालबालिकालाई भिटामिन ‘ए’ र जुकाको औषधि खुवाउँदै आएको छ। तर, यस वर्ष कात्तिक २ र ३ गते दशैंको सार्वजनिक बिदा परेकाले कार्यक्रम निर्धारित मितिभन्दा पछि सारिएको विभागले जनाएको छ।

कार्यक्रमअन्तर्गत ६ देखि ५९ महिनासम्मका बालबालिकालाई भिटामिन ‘ए’ क्याप्सुल र १२ देखि ५९ महिनासम्मका बालबालिकालाई जुकाको औषधि खुवाइनेछ।

विभागले तोकिएको मितिमा आफ्ना बालबालिकालाई नजिकैको भिटामिन ‘ए’ तथा जुकाको औषधि खुवाउने केन्द्रमा लगेर औषधि खुवाउन अभिभावकलाई आग्रह गरेको छ।

बालबालिकामा भिटामिन ‘ए’ को कमीबाट हुने समस्या रोकथाम गर्न तथा जुकाको संक्रमणका कारण हुन सक्ने स्वास्थ्य जोखिम न्यूनीकरण गर्न सरकारले हरेक वर्ष यो कार्यक्रम सञ्चालन गर्दै आएको छ। नियमित रूपमा भिटामिन ‘ए’ र जुकाको औषधि खुवाउँदा बालबालिकाको स्वास्थ्य संरक्षणमा सहयोग पुग्ने भएकाले अभियानमा सहभागी हुन स्वास्थ्यकर्मीले पनि आग्रह गर्दै आएका छन्।