जाजरकोट । जाजरकोटमा स्क्रब टाइफस संक्रमण बढ्दै गएको छ। साउनदेखि असोजसम्म तीन महिनामा जिल्लाका विभिन्न स्वास्थ्य संस्थामा गरिएको परीक्षणमा १२२ जनामा संक्रमण पुष्टि भएको छ।

जिल्ला स्वास्थ्य कार्यालयका अनुसार ४०४ जना शङ्कास्पद बिरामीको परीक्षण गरिएको थियो। साउनमा १९, भदौमा ५६ र असोजमा ४७ जनामा संक्रमण पुष्टि भएको हो।

सबैभन्दा धेरै संक्रमण नलगाड नगरपालिकामा देखिएको छ। त्यहाँ २०३ जनाको परीक्षण गर्दा ७६ जनामा संक्रमण पुष्टि भएको छ। जिल्ला अस्पतालमा १९३ जनाको परीक्षण गर्दा ४२ जनामा संक्रमण देखिएको छ। हाल अस्पतालमा दुई जना उपचाररत छन्।

निमित्त स्वास्थ्य सेवा व्यवस्थापक डा. सुनिल पुनले समयमै परीक्षण र उपचार गरे स्क्रब टाइफस निको हुने बताए। उनले ज्वरो आएमा घरमै अनुमानका भरमा औषधि सेवन नगरी स्वास्थ्य संस्थामा पुग्न आग्रह गरे।

स्क्रब टाइफस संक्रमित झाडी तथा घाँसे क्षेत्रमा पाइने ‘चिगर’को टोकाइबाट सर्छ। उच्च ज्वरो, टाउको तथा शरीर दुख्ने, अत्यधिक कमजोरी, खोकी, वाकवाकी र बान्ता यसका प्रमुख लक्षण हुन्। समयमै उपचार नभए फोक्सो, मिर्गौला र मस्तिष्कमा जटिलता आउन सक्छ।

स्वास्थ्यकर्मीले झाडी तथा घाँसे क्षेत्रमा जाँदा शरीर ढाकिने कपडा लगाउन र लक्षण देखिएमा तत्काल स्वास्थ्य संस्थामा पुगेर परीक्षण गराउन सुझाव दिएका छन्।