काठमाडौं  । चिकित्सा विज्ञान राष्ट्रिय प्रतिष्ठान (न्याम्स) वीर अस्पतालले रिक्त रहेको शिक्षाध्यक्ष, रजिष्ट्रार र डीन पदका लागि दरखास्त आह्वान गरेको छ। समितिको २०८३ साल साउन २६ गते बसेको बैठकको निर्णयअनुसार ‘चिकित्सा विज्ञान राष्ट्रिय प्रतिष्ठानको शिक्षाध्यक्ष, रजिष्ट्रार र डीन छनोट तथा सिफारिससम्बन्धी एकीकृत कार्यविधि, २०८३’ बमोजिम योग्यता पुगेका उम्मेदवारले आवश्यक कागजातसहित आवेदन दिन सक्नेछन्।
 
प्रतिष्ठानको कार्यकारी परिषद्को १७०औँ र १७१औँ बैठकको निर्णयअनुसार रिक्त पदमा नाम सिफारिस गर्न गठित छनोट तथा सिफारिस समितिले योग्य उम्मेदवारबाट आवेदन माग गरेको थियो । 
आवेदन सूचना प्रकाशित भएको मितिले सात दिनभित्र अर्थात् २०८३ साल भदौ १ गतेसम्म कार्यालय समयमा पेश गर्नुपर्नेछ। इच्छुक उम्मेदवारले प्रतिष्ठानको छैटौँ तलास्थित सोधपुछ कक्षमा आवेदन बुझाउनुपर्नेछ।

दरखास्त फाराम तथा पदका लागि आवश्यक योग्यता र अन्य विस्तृत विवरण प्रतिष्ठानको वेबसाइटमार्फत प्राप्त गर्न सकिने प्रतिष्ठानले जनाएको छ। प्रतिष्ठानले शिक्षाध्यक्ष, रजिष्ट्रार र डीनजस्ता महत्वपूर्ण शैक्षिक तथा प्रशासनिक पदमा योग्य उम्मेदवार छनोट गरी सिफारिस गर्ने जनाएको छ।