भैरहवा । रूपन्देहीको भैरहवास्थित युनिभर्सल कलेज अफ मेडिकल साइन्सेज (यूसीएमएस)ले १२८ स्लाइसको अत्याधुनिक सिटी स्क्यान मेसिन र भेन्टिलेटरसहितको नयाँ एम्बुलेन्स सेवा सञ्चालनमा ल्याएको छ।

कलेजको रेडियोलोजी विभागले २५ वर्ष पूरा गरेको अवसरमा शनिबारदेखि दुवै सेवा सुरु गरेको हो। मेडिकल कलेजका प्रबन्ध निर्देशक खुमाप्रसाद अर्यालले सिटी स्क्यान र एम्बुलेन्स सेवाको शुभारम्भ गरे।

२०५४ सालमा स्थापना भएको यूसीएमएसले यसअघि सञ्चालनमा रहेको सिटी स्क्यान मेसिनलाई विस्थापन गर्दै उच्च प्रविधियुक्त १२८ स्लाइसको नयाँ मेसिन जडान गरेको हो। नयाँ मेसिन सञ्चालनमा आएपछि बिरामीले सहज र सुलभ दरमा गुणस्तरीय सेवा पाउने कलेजले जनाएको छ।

सेवाबारे जानकारी दिन शनिबार आयोजित पत्रकार सम्मेलनमा रेडियोलोजी विभाग प्रमुख प्राध्यापक डा. सदन मुखीले करिब साढे ५ करोड रुपैयाँ लगानीमा अत्याधुनिक सिटी स्क्यान मेसिन जडान गरिएको जानकारी दिए।

उनका अनुसार नयाँ मेसिनबाट कम समयमा उच्च गुणस्तरको र भरपर्दो रिपोर्ट उपलब्ध हुनेछ। मेसिनमा मुटुको ‘थ्रीडी क्यामेरा’सहितको स्क्यान सुविधा, कृत्रिम बौद्धिकता (एआई) र ‘अटो पोजिसनिङ’लगायतका प्रविधि उपलब्ध छन्।

सिटी स्क्यान सेवा २४ सै घण्टा सञ्चालन हुने डा. मुखीले बताए। रेडियोलोजी विभागमा एक जना प्राध्यापक, दुई जना सह–प्राध्यापक, चार जना उप–प्राध्यापक, १५ जना प्राविधिक, दुई जना नर्सिङ कर्मचारी र तीन जना सहयोगी गरी २७ जना कार्यरत छन्।

यसैगरी, कलेजले शनिबारदेखि बिरामीलाई अस्पताल ल्याउन तथा लैजान भेन्टिलेटर सुविधासहितको एम्बुलेन्स सेवा पनि सञ्चालनमा ल्याएको छ।

करिब ३३ लाख रुपैयाँ लगानीमा ल्याइएको एम्बुलेन्सबाट २४ सै घण्टा सेवा उपलब्ध गराइने प्रबन्ध निर्देशक अर्यालले बताए। बिरामीलाई सरल, सहज र सुलभ दरमा सेवा उपलब्ध गराउनुका साथै नेपाल सरकारबाट तोकिएको छुटसमेत प्रदान गरिने उनले जानकारी दिए।

कलेजका अनुसार नयाँ सिटी स्क्यान र एम्बुलेन्स सेवा सञ्चालनमा आएपछि रुपन्देहीसहित आसपासका जिल्लाका बिरामीलाई उपचार तथा स्वास्थ्य सेवा लिन थप सहज हुनेछ।