मधेसका स्वास्थ्य संस्थाको अनुगमनमा मन्त्री निशा मेहता

जनकपुरधाम । मधेस प्रदेशमा स्वास्थ्य सेवालाई प्रभावकारी, व्यवस्थित तथा नागरिकमैत्री बनाउन स्वास्थ्य तथा खाद्य स्वच्छतामन्त्री निशा मेहताले विभिन्न स्वास्थ्य संस्थाको अनुगमन गरेकी छन् ।

मन्त्री मेहताले सोमबार जनकपुरधामस्थित मधेस स्वास्थ्य विज्ञान प्रतिष्ठानअन्तर्गतका विभिन्न निकाय, रक्तसञ्चार सेवा केन्द्र तथा औषधि आपूर्ति कार्यालयको अनुगमन गरेकी हुन् ।

अनुगमनका क्रममा उनले सम्बन्धित निकायको व्यवस्थापन, सञ्चालन अवस्था तथा सेवा प्रवाहबारे जानकारी लिएकी थिइन् । साथै, विभिन्न स्वास्थ्य संस्थामा देखिएका व्यवस्थापकीय कमजोरी र सेवा प्रवाहका समस्याबारे चासो राख्दै सुधारका लागि आवश्यक सुझाव दिएकी थिइन् ।

स्वास्थ्य संस्थाको सेवा प्रवाहलाई सहज, गुणस्तरीय र प्रभावकारी बनाउन व्यवस्थापकीय सुधार तथा आवश्यक समन्वयमा उनले जोड दिएकी छन् ।

स्वास्थ्य सेवामा देखिएका समस्या समाधानका लागि सम्बन्धित निकायसँग समन्वय र सहकार्य गर्दै निरन्तर पहल गर्ने प्रतिबद्धतासमेत मन्त्री मेहताले व्यक्त गरेकी छन् ।

प्रतिकृया दिनुहोस
↑