काठमाडौं।  भेरी अस्पतालमा प्रसूति सेवा लिने महिलाको संख्या बर्सेनि बढ्दै गएको छ। अस्पतालप्रति नागरिकको बढ्दो विश्वास र प्रसूति गराउन स्वास्थ्य संस्था पुग्नुपर्छ भन्ने चेतना बढेका कारण सेवा लिनेको संख्या बढेको अस्पतालले जनाएको छ।

अस्पतालका प्रमुख मेडिकल सुपरिन्टेन्डेन्ट डा. नवीन दर्नालका अनुसार आर्थिक वर्ष २०८२/८३ मा भेरी अस्पतालले ६ हजार ५९७ जनालाई सुत्केरी सेवा दिएको छ। आर्थिक वर्ष २०८१/८२ मा ५ हजार ६०८ जनाले अस्पतालबाट प्रसूति सेवा लिएका थिए।

आर्थिक वर्ष २०८२/८३ मा प्रसूति भएकामध्ये ४ हजार १४५ जनाले सामान्य तरिकाबाट बच्चा जन्माएका छन्। त्यस्तै, जटिल अवस्थामा प्रयोग गरिने भ्याकुम तथा फोर्सेप प्रविधिबाट २०५ जनाको प्रसूति गराइएको छ।

यस अवधिमा २ हजार २४७ जनाको शल्यक्रियामार्फत प्रसूति गराइएको अस्पतालले जनाएको छ। अघिल्लो वर्षको तुलनामा यस वर्ष शल्यक्रियामार्फत हुने प्रसूतिको संख्या उल्लेखनीय रूपमा बढेको डा. दर्नालले बताए।

उनका अनुसार भेरी अस्पताल पश्चिम नेपालका लुम्बिनी, कर्णाली र सुदूरपश्चिम प्रदेशका दूरदराज क्षेत्रबाट जटिल अवस्थामा रेफर भएर आउने प्रमुख अस्पताल हो।

प्रसूतिको समयमा हुनसक्ने जोखिम कम गर्न अस्पतालले दक्ष जनशक्ति, आधुनिक प्रसूति उपकरण, प्रभावकारी एनआईसीयू तथा आकस्मिक सेवा प्रणालीलाई थप सुदृढ गर्दै लगेको डा. दर्नालले बताए।

उनले अस्पतालको प्रसूति सेवा थप प्रविधिमैत्री बनाउँदै जटिल अवस्थामा आउने बिरामीलाई समेत प्रभावकारी उपचार उपलब्ध गराउनेतर्फ काम भइरहेको जानकारी दिए।