कञ्चनपुरमा निःशुल्क आँखा शिविर, ४०३ जनाले लिए उपचार सेवा

कञ्चनपुर । कञ्चनपुरको भीमदत्त नगरपालिका–९ स्थित रामटोलमा सञ्चालन गरिएको निःशुल्क आँखा शिविरबाट ४०३ जना सर्वसाधारणले उपचार सेवा लिएका छन् ।

लायन्स क्लब अफ महाकाली इन्जिनियर्सले महेन्द्रनगर आँखा अस्पतालको सहयोगमा सञ्चालन गरेको शिविरमा स्थानीयको आँखा परीक्षण तथा उपचार गरिएको हो ।

शिविरमा आँखा जाँच गराएका मध्ये ४४ जनामा मोतिबिन्दुको समस्या पहिचान भएको महेन्द्रनगर आँखा अस्पतालका नेत्र अधिकृत वीरसिंह धामीले बताए । शिविरबाट १६५ जनालाई निःशुल्क चस्मासमेत वितरण गरिएको छ ।

आँखा अस्पतालसम्म पहुँच नभएका बस्तीमा पुगेर हरेक वर्ष निःशुल्क जाँच शिविर सञ्चालन गर्दै आएको धामीले बताए । शिविरमा मोतिबिन्दु तथा आँखामा मासु पलाएका बिरामीसमेत भेटिएको उनले बताए ।

सामान्य आँखासम्बन्धी समस्या भएका बिरामीलाई शिविरमै उपचार गरिएको तथा शल्यक्रिया आवश्यक पर्ने बिरामीलाई थप उपचारका लागि महेन्द्रनगर आँखा अस्पताल पठाइएको उनले बताए ।

विकट तथा स्वास्थ्य सेवाको पहुँच कम भएका बस्तीमा सञ्चालन गरिने यस्ता शिविरबाट स्थानीयले सहज रूपमा आँखा परीक्षण, उपचार तथा आवश्यक परामर्श सेवा प्राप्त गर्दै आएका छन् ।

प्रतिकृया दिनुहोस

भर्खरै

↑