विश्व पोलियो दिवसको अवसरमा शनिबार बिहान रुपन्देहीको भैरहवामा पोलियो उन्मूलनसम्बन्धी जनचेतना फैलाउने उद्देश्यले ‘इन्ड पोलियो नाउ’ र्‍याली निकालिएको छ।

रोटरी क्लब अफ लुम्बिनी सिद्धार्थनगर, रोटरी क्लब अफ सेन्ट्रल लुम्बिनी र रोटरी क्लब अफ भैरहवाको संयुक्त आयोजनामा निकालिएकोर्‍याली लुम्बिनी गेटबाट सुरु भएको थियो। र्‍याली बर्मेलीटोल, नारायणपथ, मिलनचोक र बैंक रोड हुँदै देवकोटा चोकमा पुगेर समापन भएको थियो।

र्‍यालीमा प्रतिनिधिसभा सदस्य डा. लेखजंग थापासहित रोटरी तथा रोटर्याक्ट क्लबका सदस्यहरू र विभिन्न सामाजिक संघसंस्थाका प्रमुख तथा प्रतिनिधिहरूको सहभागिता रहेको थियो।

पोलियो रोग उन्मूलनका लागि जनचेतना अभिवृद्धि गर्ने, खोपको महत्त्वबारे जानकारी फैलाउने र पोलियोमुक्त समाज निर्माणका लागि सामूहिक प्रयासलाई प्रोत्साहन गर्ने उद्देश्यले र्याली आयोजना गरिएको हो।

पोलियो एक संक्रामक रोग हो, जसले विशेषगरी बालबालिकाको स्नायु प्रणालीमा असर पुर्‍याउन सक्छ र पक्षघातसमेत गराउन सक्छ। नियमित पोलियो खोप लगाउनु यस रोगबाट बच्ने प्रमुख उपाय हो।

विश्व पोलियो दिवसले पोलियो उन्मूलनका लागि विश्वव्यापी रूपमा भइरहेका प्रयास, खोप अभियान र जनचेतनामूलक गतिविधिको महत्त्वलाई उजागर गर्दै आएको छ।