काठमाडौं । अत्यधिक सोचाइ (ओभरथिंकिङ), तनाव र अव्यवस्थित जीवनशैलीले मस्तिष्कको स्वास्थ्यमा असर पार्न सक्ने न्युरोसर्जन डा. सुशिल मोहन भट्टराईले बताए।

द हेल्थ शो पोडकास्टमा ब्रेन एन्ड स्पाइन हेल्थबारे कुराकानी गर्दै निजामती कर्मचारी अस्पतालका ब्रेन एन्ड स्पाइन सर्जन डा. भट्टराईले तनावका कारण टेन्सन टाइप हेडेक, चिन्ता तथा निद्रासम्बन्धी समस्या देखिन सक्ने बताए।

उनले टाउको दुख्दैमा ब्रेन ट्युमर हुन्छ र ट्युमर भएपछि अनिवार्य शल्यक्रिया गर्नुपर्छ भन्ने धारणा गलत रहेको बताए। उनका अनुसार सबै ब्रेन ट्युमरमा तत्काल शल्यक्रिया आवश्यक पर्दैन। कतिपय अवस्थामा नियमित निगरानी र औषधिबाट पनि उपचार सम्भव हुन्छ।

डा. भट्टराईले मस्तिष्क स्वस्थ राख्न नियमित समयमा सुत्ने, पर्याप्त पानी पिउने, पौष्टिक खाना खाने, नियमित व्यायाम गर्ने र मोबाइलको अनावश्यक प्रयोग घटाउने सुझाव दिए। विशेषगरी सुत्नुअघि मोबाइल तथा सामाजिक सञ्जाल प्रयोग नगर्न र बिहान उठेपछि केही समय प्राकृतिक वातावरणमा बिताउन उनले आग्रह गरे।

त्यस्तै, लामो समय मोबाइल तथा ल्यापटप प्रयोग गर्दा गलत आसनका कारण ढाड र गर्दन दुख्ने समस्या बढिरहेको उनले बताए। सही आसनमा बस्ने, नियमित हिँड्ने र शारीरिक गतिविधि बढाउने हो भने धेरैजसो ढाड दुखाइ नियन्त्रण गर्न सकिने उनको भनाइ छ।

उनले टाउको दुखाइसँगै बान्ता हुने, हातखुट्टा कमजोर हुने, अनुहार बाङ्गिने वा दृष्टिमा समस्या देखिने अवस्थामा तत्काल विशेषज्ञ चिकित्सकको परामर्श लिन सुझाव दिए।

यी महत्त्वपूर्ण जानकारीका लागि हेर्नुहोस् यो विशेष भिडियो