काठमाडौं । खाद्य प्रविधि तथा गुण नियन्त्रण विभागले मापदण्डविपरीत रङ तथा रासायनिक पदार्थ प्रयोग गरिएको भन्दै तीन प्रकारका खाद्यवस्तु बजारबाट तत्काल फिर्ता (रिकल) गर्न आदेश दिएको छ । विभागले २०८३ कार्तिक २० गते जारी गरेको सूचनाअनुसार चाउमिन कलर, सोया सस र मिक्स भेजिटेबल रेड सस बजारबाट फिर्ता गर्न सम्बन्धित उत्पादक तथा वितरकलाई निर्देशन दिएको हो ।

विभागका अनुसार बजार अनुगमनका क्रममा संकलन गरिएका खाद्यवस्तुको नमुना प्रयोगशालामा परीक्षण गर्दा खाद्य नियमावली, २०२७ ले तोकेको मापदण्डविपरीत सिन्थेटिक रङ तथा बेन्जोइक एसिड प्रयोग गरिएको पाइएको छ । बजारबाट फिर्ता गर्न आदेश दिइएका खाद्यवस्तुमा राधाकृष्ण नुडल्स, बर्दिबास–११ महोत्तरीबाट उत्पादित ६०० ग्रामको चाउमिन कलर र ६०० ग्रामकै मिक्स भेजिटेबल रेड सस रहेका छन् । त्यस्तै, ग्रिन नेपाल एग्रो प्रा.लि. ललितपुर–२२ बाट उत्पादित ७५० मिलिलिटरको ड्रागन ब्रान्डको सोया सस पनि फिर्ता गर्न निर्देशन दिइएको छ ।

विभागले खाद्य स्वच्छता तथा गुणस्तर ऐन, २०८१ को दफा ३८ (२) बमोजिम सम्बन्धित उत्पादकलाई बजारमा बिक्री वितरण भइरहेका ती खाद्यवस्तु तत्काल फिर्ता गर्न आदेश दिएको हो । साथै, उपभोक्तालाई समेत उक्त उत्पादन खरिद तथा उपभोग गर्दा सावधानी अपनाउन आग्रह गरिएको छ ।