मङ्सिर १० देखि आईपीओ निष्काशन गर्दै कान्तिपुर फर्मासुटिकल्स ल्याब

काठमाडौँ । पशु औषधि तथा पशु आहार पूरक उत्पादन गर्दै आएको कान्तिपुर फर्मास्युटिकल्स ल्याब लिमिटेडले सर्वसाधारणमा सेयर निष्कासन गर्ने प्रक्रिया अघि बढाएको छ। कम्पनीले आगामी मंसिर १० गतेदेखि पहिलो चरणमा आयोजना प्रभावित स्थानीय बासिन्दा र वैदेशिक रोजगारीमा रहेका नेपालीका लागि आईपीओ बिक्री खुला गर्ने भएको छ।

कम्पनीले पहिलो चरणमा कुल ८ लाख ९० हजार कित्ता सेयर निष्कासन गर्न लागेको हो। जसमध्ये आयोजना प्रभावित स्थानीय बासिन्दाका लागि ८ लाख कित्ता र श्रम स्वीकृति प्राप्त गरी वैदेशिक रोजगारीमा रहेका नेपालीका लागि ९० हजार कित्ता सेयर छुट्याइएको छ।

आयोजना प्रभाविततर्फ काभ्रेपलाञ्चोक जिल्लाको पाँचखाल नगरपालिका वडा नम्बर ७ का स्थानीय बासिन्दाले आवेदन दिन सक्नेछन्। उनीहरूले न्यूनतम १० कित्तादेखि अधिकतम १० हजार कित्तासम्मका लागि आवेदन दिन पाउनेछन्। यस समूहका लागि आवेदन दिने प्रारम्भिक म्याद मंसिर २४ गतेसम्म तोकिएको छ। उक्त अवधिमा पर्याप्त आवेदन नपरेमा पुस १३ गतेसम्म आवेदन दिन सकिनेछ।

त्यस्तै, वैदेशिक रोजगारीमा रहेका नेपालीका लागि छुट्याइएको ९० हजार कित्ता सेयरमा न्यूनतम १० कित्तादेखि अधिकतम ७ हजार कित्तासम्म आवेदन दिन सकिनेछ। यस समूहका आवेदकले मंसिर १५ गतेसम्म आवेदन दिनुपर्नेछ।

नेपाल धितोपत्र बोर्डले कम्पनीलाई गत कात्तिक १९ गते आईपीओ निष्कासनको अनुमति दिएको हो। बोर्डबाट कम्पनीले प्रतिकित्ता १०० रुपैयाँ अंकित मूल्यमा कुल १७ लाख कित्ता सेयर निष्कासन गर्न स्वीकृति पाएको छ। यसअनुसार कम्पनीले आईपीओमार्फत १७ करोड रुपैयाँ बराबरको पूँजी जुटाउनेछ।

सेयर निष्कासन तथा बिक्री प्रबन्धकको जिम्मेवारी मुक्तिनाथ क्यापिटल लिमिटेडले पाएको छ।

कान्तिपुर फर्मास्युटिकल्स ल्याब लिमिटेड पशु स्वास्थ्यसँग सम्बन्धित औषधि तथा पशु आहार पूरक उत्पादन गर्ने नेपाली कम्पनी हो। कम्पनीले भेटेरिनरी औषधि र पशु आहार पूरक उत्पादन क्षेत्रमा काम गर्दै आएको छ।

नेपालमा पशुपालन तथा कृषि व्यवसायसँग जोडिएको यस क्षेत्रमा कम्पनीको उपस्थिति रहेको छ। आईपीओ निष्कासनसँगै कम्पनीले सर्वसाधारणबाट पूँजी जुटाउने प्रक्रिया अघि बढाएको छ।

पहिलो चरणमा आयोजना प्रभावित स्थानीय र वैदेशिक रोजगारीमा रहेका नेपालीलाई सेयर निष्कासन गरेपछि बाँकी सेयरको निष्कासन प्रक्रिया अघि बढ्नेछ।

प्रतिकृया दिनुहोस
↑