काठमाडौं । जोरपाटी अत्तरखेलस्थित नेपाल मेडिकल कलेजले स्वास्थ्य सेवा, चिकित्सा शिक्षा, प्राविधिक तथा प्रशासनिक क्षेत्रका विभिन्न पदमा कर्मचारी माग गरेको छ। कलेजले सहायक प्राध्यापकदेखि स्टाफ नर्स, प्राविधिक तथा प्रशासनिक कर्मचारीसम्मका पदमा योग्य उम्मेदवारबाट आवेदन आह्वान गरेको हो।

कलेजले प्रकाशित गरेको सूचनाअनुसार सहायक प्राध्यापक तथा लेक्चरर, स्टाफ नर्स, आईटी सहायक, क्याथ ल्याब टेक्निसियन, डेन्टल ल्याब टेक्निसियन, डेन्टल हाइजिनिस्ट, हेमोडायलाइसिस टेक्निसियन, प्रशासनिक सहायक र कम्प्युटर अपरेटर पदमा जनशक्ति माग गरेको छ। साथै सेमि क्वालिफाइड चार्टर्ड एकाउन्टेन्टका लागि पनि आवेदन खुलाइएको छ।

शैक्षिक पदतर्फ इमर्जेन्सी मेडिसिनमा एमडीजीपी, रेडियोलोजीमा एमडी, मेडिकल इमेजिङ टेक्नोलोजीमा एमएस्सी तथा बायोकेमेस्ट्री र फिजियोलोजीमा एमडी गरेका उम्मेदवारले आवेदन दिन सक्नेछन्।

त्यसैगरी, स्टाफ नर्स पदका लागि नर्सिङमा बीएस्सी वा पीसीएल उत्तीर्ण गरी नेपाल नर्सिङ काउन्सिलमा दर्ता भएको हुनुपर्नेछ। मिडवाइफरी तथा आईसीयूसम्बन्धी तालिम र कार्यअनुभव भएका उम्मेदवारलाई प्राथमिकता दिइने कलेजले जनाएको छ।

आईटी सहायक पदका लागि सम्बन्धित विषयमा स्नातक तह उत्तीर्ण गरेको हुनुपर्नेछ। नेटवर्क तथा सिस्टम सपोर्ट, हार्डवेयर, सफ्टवेयर, सर्भर व्यवस्थापन र नेटवर्क समस्या समाधानसम्बन्धी ज्ञान भएका उम्मेदवारलाई प्राथमिकता दिइनेछ।

क्याथ ल्याब टेक्निसियन, डेन्टल ल्याब टेक्निसियन, डेन्टल हाइजिनिस्ट तथा हेमोडायलाइसिस टेक्निसियन पदका लागि सम्बन्धित विषयको शैक्षिक योग्यता र तालिम आवश्यक पर्नेछ। यी पदमा कार्यअनुभव भएका उम्मेदवारलाई प्राथमिकता दिइने सूचनामा उल्लेख छ।

प्रशासनिक सहायक पदका लागि सम्बन्धित विषयमा स्नातक तह उत्तीर्ण गरेको हुनुपर्नेछ भने कम्प्युटर अपरेटरका लागि सम्बन्धित क्षेत्रमा स्नातक तहको योग्यता र आधारभूत ग्राफिक्ससम्बन्धी ज्ञान आवश्यक पर्नेछ।

इच्छुक तथा योग्य उम्मेदवारले कलेजको आधिकारिक करिअर वेबसाइट https://www.nmcth.edu/career मार्फत अनलाइन आवेदन दिन सक्नेछन्। इमेलमार्फत आवेदन दिन चाहनेले career@nmcth.edu मा आफ्नो विवरण पठाउन सक्नेछन्।

कलेजले आवेदन दिने अन्तिम मिति २०८३ कात्तिक २१ गते तोकेको छ। उम्मेदवारले आवेदन दिनुअघि सम्बन्धित पदको शैक्षिक योग्यता, आवश्यक कागजात र अन्य सर्तहरू अध्ययन गर्नुपर्नेछ।

झन्डै तीन दशकदेखि चिकित्सा शिक्षा र स्वास्थ्य सेवामा योगदान दिँदै आएको नेपाल मेडिकल कलेजको यो अवसरले स्वास्थ्य तथा चिकित्सा शिक्षा क्षेत्रमा करिअर बनाउन चाहने योग्य जनशक्तिलाई रोजगारीको अवसर प्रदान गर्नेछ।